ചൂളം വിളിയോടെ കുതിച്ചു പായുന്ന
വാഹനമായിരുന്നു അയാള്‍
അവളോ
അയാള്‍ക്ക്‌ കടന്നു പോവുന്നതിനുള്ള പാളവും
പുകഞ്ഞും കിതച്ചും അയാള്‍
അവളിലൂടെ കടന്നു പോയി
അപ്പോഴെല്ലാം ഉരുക്ക് വിരലുകള്‍ അടര്‍ത്തി
അയാളെ തടഞ്ഞു നിര്‍ത്തണമെന്ന്
അവള്‍ കരുതാറുണ്ട്‌
വീണ്ടും നീലാകാശം
മുകളില്‍ കാണ്‍കെ
അവള്‍ക്ക്‌ ഉറപ്പാകും
കിതപ്പ് അകലുകയാണ്
പുക ഒരു രാശിയായി
നീലാകാശത്തില്‍
ലയിക്കുകയാണ്
എങ്കിലും അവള്‍
വീണ്ടും പ്രതീക്ഷയോടെ കാതോര്‍ക്കും
ചൂളംവിളികള്‍ക്കും കിതപ്പുകള്‍ക്കുമായി
